WAGONJWA NA MAITI WALAZWA CHUMBA KIMOJA, WAPI HAPO NDANI YA TZ HII.........!

...................

Kukosekana kwa chumba cha kuhifadhi maiti katika kituo cha Afya cha Bulungwa wilayani Ushetu Mkoa wa Shinyanga kumesababisha wagonjwa kulala chumba kimoja na maiti, inapotokea mtu kafariki usiku. 

Kaimu Mganga Mkuu wa kituo hicho, Dk Peter Dalali amesema wanalazimika kuwachanganya na maiti hadi ndugu wa marehemu wanapowachukua. 

“Kiutaratibu siyo vyema kuwalaza wagonjwa na maiti sehemu moja, ila kutokana na ukosefu wa chumba cha maiti tunalazimika kufanya hivyo, tunaiomba Serikali kutusaidia kutatua tatizo hilo ili kuondoa hofu kwa wagonjwa,” amesema Dk Dalali. 

Dk Dalali amesema kituo hicho kwa siku hutoa huduma ya zaidi ya wagonjwa 50 na kulaza watano, idadi ambayo ni kubwa kwa mazingira ya kijijini na inapaswa kupatiwa ufumbuzi. 

Ametaja changamoto nyingine kuwa ni kituo kukosa jengo la mapokezi ya wagonjwa wa kutwa (OPD) hali inayosababisha madaktari kutoa huduma kwa zamu kutokana na kutegemea ofisi moja. 

Kaimu mkurugenzi wa halmashauri hiyo, Alfred Rukelegwa amesema changamoto hiyo ni kubwa kwa kuwa awali kituo hicho kilikuwa zahanati. 

Mbunge wa jimbo hilo, Elias Kwandikwa ameahidi Sh500,000 za ujenzi wa jengo jingine ili kuondoa upungufu katika hospitali hiyo. 

Pia, ameahidi kutafuta wafadhili watakaosaidia kujenga chumba cha maiti pamoja na kushirikisha wakazi wa wilaya hiyo kuchangia ujenzi huo. 

“Tunapaswa kulichukulia suala hili kwa uzito na kwamba kila mmoja aone kulaza mgonjwa na maiti ndani ni jambo ambalo halikubaliki na linaloogopesha,” amesema Kwandikwa. 

 

chanzo:eddy blog

GIVE YOUR OPINIONS HERE