TZ yawaaga wanajeshi waliouawa Darfur

...................

Rais wa Tanzania Jakaya Kiwete amewaongoza maelfu ya waombolezaji katika kutoa heshima zao za mwisho kwa wanajeshi saba wa Tanzania waliouawa nchini Sudan.

Saba hao walikuwa katika harakati za kulinda amani chini ya Muungano wa Afrika katika jimbo la Darfur nchini Sudan tarehe 13 mwezi Julai.

Miili ya wanajeshi hao iliwasili mjini Dar es Salaam siku ya Jumamosi, na kupokelewa na mamia ya waombolezaji walioongozwa na makamu wa rais Dokta Gharib Bilal, katika uwanja wa kimataifa wa ndege wa Julius Nyerere kabla ya kupelekwa katika chumba cha kuhifadhia maiti katika hospitali ya kijeshi ya Lugalo.
Hafla ya kuwaaga wanajeshi hao inaendelea katika uwanja wa makao makuu ya jeshi eneo la Upanga.
Rais Kikwete anawaongoza jamaa familia na rafiki wa wanajeshi hao kuwapa heshima zao za mwisho kabla ya maziko nyumbani kwao.
Wanajeshi hao wa TPDF ni pamoja na Sajenti Shaibu Shehe, Corporal Oswald Chaulo, Corporal Mohammed Ally, Corporal Mohammed Chukilizo, Private Rodney Ndunguru, Private Fortunatus Msofe na Private Peter Werema.
Rais wa Sudan Omar Al Bashir wiki jana alimhakikishia rais Jakaya Kikwete kuwa wote waliohusika katika kuwashambulia wanajeshi hao na kuwaua watakamatwa na kuchukuliwa hatua za kisheria.
Rais Bashir alitoa ahadi hiyo wakati wa mazungumzo na Kikwete akiongeza kuwa anaamini waliohusika na mauaji hayo walikuwa wahalifu na kuwa lazima wasakwe.

chanzo:bbcswahili

GIVE YOUR OPINIONS HERE